Kas ir lokalizaceja?
Terminu lokalizaceja (angļu abriavetura l10n - pyrmais i pādejais vuorda localization burts,
a pa vydu- puorejū burtu skaits) lītoj, runojūt par operaceju jau internacionalizeitā
programmu kūpā, kurā nūdūd programmai vysu napīcīšomū informaceju, kab tei varātu
adapteitīs i spātu traktēt tuos īvadi i izvadi taidā manīrē, kas ir pareizs attīceibā iz kaidu
dzymtū volūdu. Lokalizaceju atbolsta tulkuotuoji.
Kas ir po faili?
Po faili satur originaltekstus i paraleli puortulkuotūs tekstus, kuri nūdrūšynoj sistemys
lokalizaceju. Tekstu puortulkuošona teik veikta, pīm., ar programmu poEdit.
A kas ir Linux?
Linux pats par sevi ir tikai operaceju sistemys kerneļs - kūduls, kas kontrolej aparaturu,
puorvolda failus, atdola procesus utt. Pastuov dažaidys Linux kombinacejis ar dažaidom
aplikacejom i utilitom, lai nūformeitu piļneigu operaceju sistemu. Ituos kombinacejis teik
sauktys par Linux distribucejom. Nivīna nu ituom distribucejom nav "oficialais voi originalais
Linux".
Seikuoku informaceju meklejit linux.lv
Kas ir Mandriva Linux?
Mandriva Linux ir fraņču distributivs, kas baļsteits iz piļneigu 32 bitu daudzuzdevumu
(multitasking) opereituojsistemu. Mandriva pyrmsuokumi ir RedHat Linux. Taipat kai RedHat
Mandriva Linux var struoduot iz platformom suocūt nu 486 da Pentium IV. Linux Mandriva
apvīnoj stabilu UNIX sistemu ar ārtu lītuotuoja grafiskū saskarni (interfeisu) - KDE.
Komplekteita ar pasaulē vysvairuok izmontuotū webserveri - Apache, ka ari daudzom cytom
spieceigom programmom i serverim.
Seiks aproksts itamā saitē: http://www.mandriva.com
Kuopiec Mandriva Linux?
Tuopiec, ka tys ir bezmoksys, popularuokais i pīejomaikais nu Linux distributivim, iz kuru
ir vīgli puorīt nu Windows sistemom.
Kuopiec jius vyspuor koč kū taidu dorot?
Tuopiec, ka myusim tys pateik! Mes gribim panuokt lobu latgalīšu volūdys atbolstu Linux
sistemā, leidz ar tū ari atteistēt latgalīšu datorterminologeju, kas ir vitali svareiga latgalīšu
volūdys saglobuošonai.
Voi es varu jimt daleibu?
Mes jiusus gaidom! Rokstit marlau@inbox.lv i izsokit sovu vieļmi i tū, kai gribit paleidzēt.
Vysvairuok jiusu leidzdaleiba ir napīcīšama tulkuošonys projektā. Vyss dorbs ir
breivpruoteigs (nivīns napeļnej nu tuo naudu). Mes byusim pateiceigi par sevkuru daleibnīku.
Lai koč kū suoktu tulkuot, juosaskaņoj ar myusim - marlau@inbox.lv
Kuopiec jiusu lopā ir ekranattāli?
Tuopiec, ka daudzi cylvāki nimoz nazyn, cik Linux operaceju sistema var skaisti izavērt (kaut
gon - gaumis vaicuojums). Daudzim vīneigais prīkšstots par tū ir kai par bezjiedzeigu
komandryndu. Ekranattālu nūlyuks ir ari uzskotami demonstrēt dažaidu volūdu atbolstu Linux.
